وذن وحدة ... ماتصفقش !!!
اثبتت اخر الاحصائيات الي عملتها الي التونسي الانسان الوحيد على البسيطة الي يسمع بوذن وحدة ويتفاعل ديراكتمون واثبتت الدراسةان اول الاعضاء الي تتاثر بالتوشويش في الوذن هي الفم وبعد مرتدة "البونية" وفي اقصى الحالات واذا اقتضى الامر ضربة بالراس لاتقري لاتكتب... كما اثبتت الدراسة ان فرقة التوشويش لبث الاشاعات استغلت هاته الفراسة النوعية عند التونسي لتمرير مآربها خاصة مع الذين تعجبهم برشا حكاية 'النملة والصرار ومؤامرة القمح الماسوني" ... ياخي مرة يوشوشوا لجماعة اليسار في الوذن لمين ومرا يوشوشوا لجماعة اليمين في الوذن ليسار المهم توشويشتين برك تلحم بعدها في الفايسبوك بمقالات "خطير جدا و سري للغاية " وتدخل بعضها في الشارع وصراعات حزبية وايديولوجية ونزاعات عروشية ... لذا كان واجبا علي بعض القوى الخيرة مجابهة الظاهرة هذي بواسطة السلاح الخطير"الباتونا" متاع الوذنين لتنظيف المجاري السمعية لدى البعض ممن تحركهم العاطفة ليه ليه كي موتور 103 متاع الحاج صالح جارنا...
وقد مانصحنا وقلنا ياناس راو ربي خلق زوز ذنين باش تسمع من هذا ومن ذاك وبعد عندك وعيك اللازم باش تفرق بين الصواب والخطا وبين الاشاعة والحقيقة ... قالولي انت انسان حداثي تحب تقضي على موروث الاشاعة التقليدي الي حافظوا عليه اجدادنا عنا قرون وظاهر فيك تنتهج سياسة التطبيع مع النقبة المثقفة لاخفاء الحقائق تي قالولي صدقني ماتطلع كان بوليس سياسي كيما قال الهمامي ولا باز راك تابع فرقة مكافحة الاشاعة الممولة من **** متاع *** ...
تي خلاصة الامر بلوغة نفهموها الكل
يزي رانا عورنا بتصديق الاشاعات ... ووذن وحدة ماتصفقش
هناك 3 تعليقات:
الله غالب الشعب التونسي عمل حاجة باهية برشا لكن وقف في نص شطر الطريق و كل واحد بدا يلوج على مصلحتو. حتى كان نعملو في كل عام ثورة مادام العقلية و طريقة التفكير عند التونسي هي هي معناها حتى شيئ ما هو باش يتبدل في هالبلاد. على فكرة أنا عضوة جديدة هنا انشاء الله تقبلني و راني معجبة برشا بالمجموعة متاع صفحة الحقائق الخفية و انشاء الله ربي معاكم
rak tiktib bil 3arbi ya amén allah..7att l ktiiba aligné à droite :)
صراحة نص رديء و لا يتوفر فيه أدنى مقومات التدوين من حيث التقديم الشكلي " presentation " أو كذلك من حيث الأسلوب ... الفكرة جميلة لكن أتمنى أن تعيد صياغتها لتتلاءم مع ما تريد أن تبلغه من أفكار ... هذا التعليق ليس إلا من باب النقد البناء ... أتمنى أن أقرأ مقالة أجود من هذا في المستقبل القريب ... و شكرا
إرسال تعليق