فدينا من السندويتشات فدينا من اللازانيا ،نرفض الوصايا الغربية على ماكلة الدار ... هكذا بدات اول ملامح الانقلاب في الكوجينة ومن هنا بدات فكرة المجلس التكسكيسي لانقاذ عولة الدار من الالتفاف عليها...
ففي يوم من الايام قرر الوالد باش يذبح ديك "سردوك" كان خويا الصغير يعيطلو "تاتور"... تلمينا الكل وجبد بابا السكينة وذبح "الديكتاتور"
سال منو الدم ، فرحنا الكل وقلنا الليلة باز كسكسي بلحم الديكتاتور ... اما كانت الطامة الكبرى في الليل، تعارك بابا وامي
بابا شرى سندويتش وامي طيبت لازانيا ومن هنا بدات الانتفاضة
وبدات صيحات الشعب " انا وخواتي" من سيدي كوجينة تكبر شيئا فشيئا حتى سمعو دارنا والجيران هتافاتنا وشعاراتنا
"فدينا من السندويتشات فدينا من اللازانيا ،نرفض الوصايا الغربية على ماكلة الدار "
كبرت الاحداث ولحمت في الدار وسقط عديد الكيسان والفناجي جرحي وللاسف تكسر شطر زهاز الدار" انا للزبلة وان اليها لراجعون"
وهنا تدخلت جداتي وبعد مفاوضات قررنا الكل نعملو عولة للدار وجات فكرة المجلس التكسكيسي الي باش تعلم فيه جداتي امي فن التكسيس لارضاء جميع الاطراف ... وكان من المقرر انو يكون 24 جويلية موعد التكسكيس ... غير انو عمتي "الي تسكن في فرنسا"
كلمت جدتي بالسرقة ، قالتلها اجل موعد المجلس التكسكيسي راي بنتي مازالت موش محضرة روحها وماتحضر كان في 23 اكتوبر
...........
ودارت الايام وكي قرب موعد المجلس التكسكيسي جاتنا جدتي "لاعبتها" متغششة وقالت قمح السنة موش حاجة خلينا نستنوا الحصيدة بعد 24 جويلية راهم قالو قمحها عال العال... وبطبيعة لازمم جدتي تلهينا شوية ، ياخي طرحت علينا سؤال وروحت لدارها
وقالت "ايا كل واحد يقلي كيفاش يحب ياكل الكسكسي بلحم الديكتاتور"
????
وعينك ماترى النور... بعد اكا السؤال لحمت مابيناتنا
الي هذا يقلك ناكل بلمين ولاخر يقلك ناكل باليسار والي يقلك انا حداثي ناكل بالمغرفة ومانسميش "بسم الله" ولاخر يقلوا انا ناكل بيدي ونقول "بسم الله" يا كافر ... المهم دخلنا في زوبعة وجدتي شايخة علينا ضحك وتخطط هي وعمتي الي في فرنسا كيفاش يستغلوا الاحداث ويطلقوا بابا من امي ، ونحن عيلة كاملة كي الاطرش في الزفة ومازلنا شادين فكا لمشد متاع "ناكل باليمين ولا ليسار ، نقول بسم الله في قلبي ولا نجهر بيها، ناكل بيدي ولا بالمغرفة ، نبدا بلحم ولا بالكسكسي"
وقرب موعد 23 اكتوبر وحضرت بنت عمي روحها وهاي جاية في الثنية من فرنسا.... يتبع
انتظرونا
هناك 4 تعليقات:
hhh wallahi kother el ham ydha7ak kifma 9alou nes bekri
المجلس التأسيسي بنسخة عربية اصيلة وتقليدية D:
والله حتى التكسكيسي ياسر فيهم
مقالة رائعة لكن امان الله مع احترامي و تقديري لك ارجو ان تحذف هذه الكلمة " انا للزبلة وان اليها لراجعون " فهذا تحريف للآية الكريمة " انا لله و انا اليه راجعون " كلنا نخطئ و نصيب
إرسال تعليق